Khona izimoto oke uzibuze ukuthi zithengwa ngobani uma ubona amanani azo. Uke uzibuze futhi ukuthi kazi umnikazi akazibonanga yini ezinye izimoto ezinkulu kunayo. Kodwa khona osuke ungakucabanganga, lokho ukuthi izimoto sizithengela izizathu ezihlukene. Khona abachazwa ukuthi imoto yabo incane futhi iyagijima yize ibukeka ibiza. Lapha ngikhuluma ngabanikazi bamaVW Polo GTI nomaFord Fiesta ST. Lezizimoto ziyabiza, iFord Fiesta iqala kuR325,000. Leli nani lingaphezu kweFord Focus eshibhe kunawo wonke yize iFord Focus inkulu. Kodwa uma ubuka izinto kanje, ungaze ukhohlwe ubumnandi beFord Fiesta ST nobempilo. Futhi akusibo bonke abantu abadinga izimoto ezinkulu kunalezi abazithengayo.

Ubumanandi bezimoto ezincane ezigijimayo sibuzwe ngeFord Fiesta ST200 esisanda kuyishayela. Lemoto yenziwe uFord ukubungaza lamaFord Fiesta ST akhona ngoba sekuza amasha. Uma ucabanga ukuthi iFord Fiesta ST iyakuchaza, cabanga into oyithanda kakhulu ongacabangi ukuthi ingaba ngcono kunalokhu eyikho kodwa ivele iba ngcono kakhulu. Yize iFord Fiesta ST200 ibiza uR14,000 ngaphezulu kweFord Fiesta ST ejwayelekile, inokuchaza okungale kwalena ejwayelekile.

Ngaphandle, iFord Fiesta ST200 ihluka ngombala wayo ometalic okuthiwa uStorm Grey, amasondo awu17-inch, nezicathulo zamabhleki ezibomvu kanye nemibhalo ethiST200. Uma uvula umnyango wemoto ubingelelwa imibhalo ekhanyayo ebhalwe ukuthi ST200. Phakathi khona izihlalo zizimoto ezigijimayo ezakhiwa inkampani yakwaRecaro, ezineleather futhi okwazi nokuzifudumeza. Ngemuva, uFord ufake ikhamera kanye namasensa okuhlehla. Imibhalo kaFord Fiesta ST200 awuyisweli ngaphakathi kwalemoto okwenza ithandeke kakhulu.

Umkhuba ungaphakathi kwenjini yeFord Fiesta ST200. Lemoto ehamba ngenjini ethenjwe kakhulu kwaFord eyi1.6 litha EcoBoost, inamandla angu 147 kW. Lokhu kuchaza ukuthi amandla ayo athe xaxa ngama kW awu 13 kune Ford Fiesta ST ejwayelekile. IFiesta ST200 isuka ku 0-100 k/m kumasekhondi awu 6,7. Usazibuza ukuthi abantu abahamba ngalezi zimoto ezincane ezigijimayo bazithandelani?

Ukushayela lemoto kujabulisa kakhulu. Amandla ayo uwezwa uyiqala kodwa kumele ugade ibhleki ngoba uthi ususa kancane unyawo kwiklashi ibe isifuna kuhamba. Amandla ayo akhona kuwo wonke amagiya. Uma ukade usesivinini esiphezulu, ukwenciphisa isivinini akusho ukuthi kumele uye emagiyeni aphansi ngokushesha. Lemoto ibambeka kahle futhi emakhoneni kanti namabhleki abamba eduze uma kudingeka uyibambe eduze. Yize lemoto ibaleka kodwa iyashayeleka kahle ezimweni ezijwayelekile zomgwaqo. Ngenkathi ngiyihlola ngabe sengijwayele ukuya ngayo emsebenzini ngingaxakwa amandla enawo. Yize lemoto ineminyango emibili yabagibeli, kuyahlaleka unethezele ngemuva. Nebhuthi ayincane kakhulu. Ngingathi ikahle uma iqhathaniswa nezimoto ezingangayo.

IFord Fiesta ST200 ibiza uR339,900. Lemali ikutholela iwaranti yeminyaka emine noma yamakhilomitha awu 120,000 kanye neplani lokusevisa leminyaka emine noma amakhilomitha awu 60,000.