Kuthi akubenzinyana ukukhuluma ngento noma ngomuntu owazi ngemiklomelo yakhe. Kubesekwazi vele ukuthi lento noma lowo muntu uyathandeka. ISuzuki Cilerio ifike kithi seyaklonyeliswa ngokuba yimoto encane evelele yonyaka abakwaCars.co.za. Lapha ishaye emakhanda iRenault Sandero kanye neToyota Aygo. Ungazibuza uziphendule ukuthi iqhathaniswa kanjani neRenault Sandero enkulu kunayo? Imibandela eyabe ibekiwe kwabe kuwukuthi imoto kufanele ibe ngaphansi kuka R160,000 futhi kuleli nani kube khona iABS kanye nama-airbag. Okunye okwakubukwa amajaji ukuthi imoto iwudla kangakanani u-petrol, uthola okungakanani kulemoto ngenani layo, kulula kanjani ukuyisebenzisa kanye nokwethembeka kwabakhi bayo. Singathi kuloluhlu lokugcina, akubanga inkinga kwazise phela abakwaSuzuki baphuma phambili njenge nkampani yezimoto evelele kulemiklomelo yakwaCars.co.za.

Ngaphandle iSuzuki Celerio ithi ayifane nazo zonke zimoto ezincane. Okuthi akuhluke ngayo wukuthi yona ibukeka inkudlwana futhi iphakeme kunalezi ezinye izimoto ezincane. Lokhu bukhudlwana beCelerio ubuzwa ngisho usuphakathi kwayo. Nebhuthi yeCelerio iyamangaza. Ithe ukuba nkudlwana kunezinye zalezizimoto ezincane.

Ngaphakathi iSuzuki Celario yakhiwe kahle. Noma kukhona amaplastiki amaningi aqinile kwidash board, lamaplastiki angawomgangatho okhombisa ukuthi ngeke asheshe aguge. Okunye ukuthi iSuzuki Celerio GL lena ebesiyishayela iphuma isinezinto eziningi okungamele uzikhokhele njengamawindi kagesi, amalambu enkungu, iradio edlala amaMP3 futhi ivumele izingoma zidlale kwibluetooth. Yize ukwazi ukuthi uyikhiye nge-immobiliser iCelerio, ayikwazi ukuzikhiya yona uma uyishayela. Kumele ukhumbule ukuyikhiya wenamathupha. Nokho lokhu asikuthokozelanga kwazise phela ukuthi izwe aliphephile. Impela singamane singabi nezinkinombo esitelingini ezikwazi ukunyusa nomazehlise umsindo emotweni kunokuthi sibe emotweni engakwazi ukuzikhiya. Okunye okungasishayanga umxhwele kwiCelerio wukuthi isitulo somshayeli asinayo into yokunqikisa ikhanda ehamba yodwa. Lokhu kusho ukuthi uma uthe ukuba mude, into lena yokubeka ikhanda eyakhelwe esitulweni, igcine ithinta kabi intamo yakho futhi ingakuniki indawo eyanele yokunqikisa ikhanda lakho.

Esikuthande kakhulu kuCelerio lena ebesiyivivinya, amandla enjini yayo kanye nokuthi ayiwudli kakhulu u-petrol. Amanye amaSuzuki kanye nezinye izimoto ezincane esike sizishayele, zidinga ukuthi sishintshe kaningana kuze sigcine imoto inamandla anele. Khohlwa yilokho ngeCelerio. Injini yayo enamandla awu50kW iyakumamngaza. Ikwazi ukubamba amandla ngendlela ejabulisayo. Lokhu ukubona ngisho uhamba kuthela wayeka. Isivinini esisemthethweni sika120 isibamba kuthule umoya. Akubi ngathi uyayihlukumeza lemoto encane. Okujabulisa ukudlula okuningi ukuthi iCelerio ayiwudli kakhulu u-petrol. Abakwa Suzuki bathi idla u4,7 litha kumakhilomitha awu100 osuke uwahambile. Kithi yathi xaxa kunalo4,7 kodwa yabe iselokhu iphansi kakhulu.

Amanani amaSuzuki Celerio akhona eMzansi Afrika abiza kanje:

Celerio 1.0i GA MT – R133,900
Celerio 1.0i GL MT – R150,900
Celerio 1.0i GL AMT – R164,900

Amanani e-Suzuki Celerio 1.0i GL MT kanye neCelerio 1.0i GL AMT akunikeza i-service plan yeminyaka emibili noma amakhilomitha awu30,000 kanye ne-warranty yamakhilomitha awu100,000 noma izinyanga eziwu36. Iwarranty iyatholakala nakuCelerio 1.0i GA MT.